Licenciado en Medicina e Cirurxía e especialista en Uroloxía. Na actualidade, traballa en Polusa (Lugo). É membro da Sociedade Galega e Española de Uroloxía. Cultiva a pintura, a música e a escrita. Ten publicadas cinco novelas e dous libros de poemas: un en solitario -’Vaite baixo’- e outro con Xosé Carlos Ulloa, ‘Nuevo amanecer’.

Catedrático xubilado de Lingua Castelá e Literatura, deuse a coñecer como poeta en 2006, obtivo numerosos premios, e publicou unha vintena de libros de poesía, deles 14 poemarios con títulos como ‘Outono, mancebo céfiro das ás ergueitas’, ‘Salaios da Chaira’, ‘Miño río pai e amigo’, ‘Guía poética da Muralla de Lugo’, ‘Poemas da cidade’, ‘Valuria’, ‘Muralla lúa chea imperial’ ou ‘Sinódica Luz’.

En ‘O espello de Celia’ (Premio Xoán Díaz), conversaba cunha das últimas habitantes da súa aldea, falecida no 2017. Gañou o (Re)inventando Xela Arias e o Lorenzo Baleirón con ‘Neve’, editado por Chan da Pólvora. Participou na obra colectiva ‘Última poesía crítica. Jóvenes poetas en tiempos de colapso’. Escribe sobre as persoas que viviron nun mundo que logra recuperar a través da poesía.

Mestre, contador de historias, poeta, escritor e guionista, como poeta publicou ‘LP’, ‘Long Play’ e ‘Lugo Philadelphia’, con fotografías de Alba Díaz. Coordina a Sección de Literatura de Tradición Oral da AELG. Ten obtido os premios de Teatro radiofónico da Radio Galega; Premio aRi[t]mar ao mellor poema editado en Galicia en 2018), Agustín Fernández Paz e os de literatura infantil Raíña Lupa e María Victoria Moreno.

Fuxan os Ventos e A Quenlla cantaron poemas seus. É autora do musical ‘A Casa’ e de obras teatrais como ‘O premexentes non poden cos paxaros rebezos’ ou ‘Confusión de María Balteira’. Premio da Cultura Galega, conmóvenos cos poemarios ‘Tras as portas do rostro’ ou ‘Pedinche luz prestada’, e a súa  ‘Memoria para Xoana’ foi Premio de Narrativa Concello de Vilalba, editada por Espiral Maior e premiada pola AELG.

Estudou Bioloxía na USC, especializándose en xestión da biodiversidade na de Granada. Ten desenvolvido traballos de investigación no Departamento de Botánica do Campus de Lugo, destacando na creación literaria, especialmente na poesía. Premiado co Díaz Jácome para novos creadores e no de Cambre, ten publicado Cristal de bágoas, premio de poesía O Facho.

Escritora, xornalista e profesora de lingua e literatura española. Ten traballado no xornal El Progreso de Lugo e Europa Press. Escribe contos, teatro e cancións para nen@s, colabora en diversos medios, ademais de ser co-editora do fanzine ‘A Revolta’. Dende 2017 co-dirixe o proxecto Espora (Escolas pola Radio) co que traballa en toda Galiza.

Profesora, poeta e actriz, ten un importante labor no teatro afeccionado como autora, tradutora, adaptadora e directora, e tamén como pedagoga e divulgadora. En poesía acadou os premios do Concello de Vilalba e Arume de poesía para nenos, tendo publicados títulos como ‘Catro palabras caladas’, ‘Datando lembranzas’, ‘Con Fausto por este río acima’ ou ‘Sonetos preposicionais’.

Profesora de Lingua e Literatura españolas no IES Díaz Castro de Guitiriz, forma parte do colectivo Comadres das Letras, co que publicou ‘Contármonos’ (2023). Autora de mapa.gal (2023). Responsable dos blogs de creación probaorellas.blogspot. com e entrenodiariocanti.blogspot.com, foi premiada nos Certames A Pipa'97, MicrorrelatAs (2021) e Manuel Oreste Rodríguez López (2021).

Doutora en Filoloxía galega pola USC, posúe os premios Losada Diéguez e os Nacionais da Crítica e de Poesía. O Patronato de Cultura Galega de Montevideo dedicoulle en 2004 o Día da Poesía Galega. Libros sobre a obra de Rodríguez Fer e Novoneyra, acredítana como ensaísta. Luminosos poemarios (‘A teta sobre o sol’, ‘Nós nus’, ‘A cousa vermella’, ‘Cráter’, ‘Feliz idade’…) conságrana como gran poeta.

Profesor, cantante e escritor. Membro fundador de Fuxan os Ventos e A Quenlla, ten recollido canción tradicional por toda Galicia, e composto música como a de ‘O Carro’, que dan máis vida a poemas fundamentais. Galardoado co Pedrón de Ouro ou Facer País, o seu labor poético está recollido en libros esenciais, e tenlle deparado numerosos premios.

Catedrático de Filosofía. Exerceu no IES Lucus Augusti de Lugo e foi xefe de estudos e secretario do Ingabad. De 1991 a 2005 foi delegado provincial en Lugo da Consellería de Cultura da Xunta de Galicia. Escribe poesía, e un amigo presentou no seu nome un poema ao Certame de Poesía do Belén de Begonte, conseguindo así o seu primeiro premio literario.